ഉത്തര്പ്രദേശ്: തെരഞ്ഞെടുപ്പുകളില് നേരിട്ട തിരിച്ചടികളില് നിന്നും അതിശക്തമായി തിരിച്ചു വരാന് കോണ്ഗ്രസ്. ഇതിന്റെ ഭാഗമായി ഉത്തര്പ്രദേശിലെ മുഴുവന് കോണ്ഗ്രസ് കമ്മിറ്റികളും പാര്ട്ടി ദേശീയ അധ്യക്ഷന് മല്ലികാര്ജ്ജുന് ഖര്ഗെ പിരിച്ചുവിട്ടു.
2027 ലെ നിയമസഭാ തെരഞ്ഞെടുപ്പ് കൂടി മുന്നില് കണ്ടാണ് നീക്കമെന്നാണ് ചൂണ്ടിക്കാണിക്കപ്പെടുന്നത്. ജില്ലാ, നഗര, ബ്ലോക്ക് കമ്മിറ്റികളാണ് പിരിച്ചുവിട്ടത്.
ലോക്സഭാ തെരഞ്ഞെടുപ്പിലും പിന്നാലെ നടന്ന ഉപതെരഞ്ഞെടുപ്പിലും കോണ്ഗ്രസ് നേരിട്ട തിരിച്ചടികളില് നിന്നും കരകയറാനുള്ള നീക്കത്തിന്റെ ഭാഗമായാണ് നടപടിയെന്നാണ് വിവരം. സംസ്ഥാന നേതൃത്വത്തില് അഴിച്ചുപണി നടത്തുകയും പ്രദേശിക തലത്തില് പാര്ട്ടിയുടെ അടിത്തറ മെച്ചപ്പെടുത്തുകയുമാണ് ലക്ഷ്യം. ലോക്സഭാ തെരഞ്ഞെടുപ്പിന് ശേഷം നടന്ന ഉപതെരഞ്ഞെടുപ്പില് കോണ്ഗ്രസിന് ഒരു സ്ഥാനാര്ത്ഥിയെ പോലും മത്സരിപ്പിക്കാന് കഴിഞ്ഞിരുന്നില്ല. പകരം ഇന്ഡ്യാസഖ്യത്തിലെ സ്ഥാനാര്ത്ഥിയെ പിന്തുണക്കുകയുമാണ് ചെയ്തത്.
അയോധ്യ രാമക്ഷേത്രം ഇരിക്കുന്ന മണ്ഡലത്തില് അടക്കം വിജയിച്ച് ലോക്സഭാ തെരഞ്ഞെടുപ്പില് മെച്ചപ്പെട്ട വിജയം നേടാനായത് കോണ്ഗ്രസിന് പ്രതീക്ഷയായിരുന്നു. ഈ സാഹചര്യത്തില് കൃത്യമായ കരുനീക്കി നീങ്ങി നിയമസഭയില് അധികാരം പിടിക്കുകയും കോണ്ഗ്രസ് ലക്ഷ്യമിടുന്നു. അജയ് റായിയാണ് നിലവിലെ പ്രദേശ് കമ്മിറ്റി പ്രസിഡന്റ്. കഴിഞ്ഞ ലോക്സഭാ തിരഞ്ഞെടുപ്പില് വാരാണസിയില് മത്സരിച്ച അജയ് റായ്, പ്രധാനമന്ത്രി നരേന്ദ്രമോദിയോട് മികച്ച പോരാട്ടം കാഴ്ചവെച്ചിരുന്നു.
നിലവിലെ സംഘടനയുടെ തെറ്റുകള് തിരുത്താന് കടുത്ത തീരുമാനങ്ങള് വേണ്ടിവരുമെന്ന് ഖാര്ഗെ നേരത്തെ പറഞ്ഞിരുന്നു. പാര്ട്ടിയുടെ അടിത്തട്ടുമുതലുള്ള പുനസംഘടനയിലൂടെ മാറ്റങ്ങള് കൊണ്ടുവരാനാകുമെന്നാണ് പ്രതീക്ഷ. അടുത്ത നിയമസഭാ തെരഞ്ഞെടുപ്പില് കോണ്ഗ്രസ് കൂടുതല് സീറ്റുകളില് മത്സരിച്ച് സമാജ്വാദി പാര്ട്ടിയുമായി ചേര്ന്ന് ഭരണം നേടാനാണ് ശ്രമം.
