പിറവം: എടയ്ക്കാട്ടുവയലില്‍ ക്ഷീര കര്‍ഷകന്റെ ഗര്‍ഭിണിയായ പശുവിനെ അയല്‍വാസി വെട്ടിക്കൊലപ്പെടുത്തി. പള്ളിക്കനിരപ്പേല്‍ മനോജിന്റെ 4 മാസം ഗര്‍ഭിണിയായ പശുവിനെയാണ് അയല്‍വാസി വെള്ളയ്ക്കാട്ട് തടത്തില്‍ രാജു പി.വി (55) വെട്ടി കൊലപ്പെടുത്തിയത്. പ്രതിയെ മുളന്തുരുത്തി പോലീസ് അറസ്റ്റ് ചെയ്തു. ചൊവ്വാഴ്ച രാവിലെ 8.30 ഓടെയാ മനോജിന്റെ ഭാര്യ സുനിതയും മക്കളും വീട്ടിലുണ്ടായിരുന്ന സമയത്ത് പ്രതി കോടാലിയുമായെത്തി തൊഴുത്തില്‍ കെട്ടിയിരുന്ന പശുവിന്റെ കഴുത്തില്‍ വെട്ടുകയായിരുന്നു. മനോജിന്റെ പുരയിടത്തില്‍ നിര്‍മ്മിക്കുന്ന തൊഴുത്ത് പ്രതിയുടെ കുടിവെള്ളത്തെ ബാധിക്കുമെന്ന് പറഞ്ഞാണ് ആക്രമണം നടത്തിയതെയന്ന് മനോഡിന്റെ ഭാര്യ സുനിത പറഞ്ഞു.
10 ലീറ്റര്‍ കറവയുള്ള മറ്റൊരു പശുവിനെയും പ്രതി വെട്ടിപ്പരിക്കേല്‍പ്പിച്ചു. ശബ്ദം കേട്ട് ഓടി എത്തിയ സുനിതയുടെ നേരെ പ്രതി കോടാലി വീശുകയും, കാലിന് സര്‍ജറി കഴിഞ്ഞ് വിശ്രമിക്കുക ആയിരുന്ന മകന്‍ മനുവിനെ ആക്രമിക്കുകയും ചെയ്തു. തുടര്‍ന്ന് വിവിരമറിഞ്ഞെത്തിയ മുളന്തുരുത്തി പൊലീസ് പ്രതിയെ കസ്റ്റഡിയില്‍ എടുത്തു. എടയ്ക്കാട്ടുവയല്‍ മൃഗാശുപത്രിയില്‍ നിന്നും ഡോക്ടര്‍ എത്തി പരിക്കേറ്റ പശുവിന് ചികിത്സ നല്‍കി.പഞ്ചായത്തിന്റെ ആനുകൂല്യം ലഭിക്കുന്ന ക്ഷീര കര്‍ഷകനാണ് മനോജ് എന്ന് പഞ്ചായത്ത് അധികൃതര്‍ പറഞ്ഞു. എല്ലാ മാനദണ്ഡങ്ങളും പാലിച്ച് വ്യത്തിയായി കന്നുകാലികളെ പരിപാലിക്കുകയും അത് വഴി ഉപജീവനം നടത്തുന്നവരാണ് മനോജും ഭാര്യ സുനിതയുമെന്ന് അധികൃതര്‍ പറഞ്ഞു.
