ഹരിയാന: പത്തുവര്‍ഷമായുള്ള ഹരിയാനയിലെ ബി.ജെ.പി ഭരണത്തിനെതിരെ ആഞ്ഞടിച്ച് രാഹുല്‍ ഗാന്ധി. വരാനിരിക്കുന്ന തെരഞ്ഞെടുപ്പിന് മുന്നോടിയായി കോണ്‍ഗ്രസ് നേതൃത്വം പ്രകടനപത്രിക പുറത്തിറക്കിയതിനു പിന്നാലെയാണ് രാഹുലിന്റെ പ്രതികരണം. സോഷ്യല്‍ മീഡിയ പ്ലാറ്റ്‌ഫോമായ എക്‌സിലൂടെയാണ് ബി.ജെ.പിയ്‌ക്കെതിരെ രാഹുല്‍ ഗാന്ധി വിമര്‍ശനം ഉന്നയിച്ചിരിക്കുന്നത്.
ഹരിയാനയിലെ ജനങ്ങള്‍ പത്തുവര്‍ഷമായി അനുഭവിക്കുന്ന വേദന കോണ്‍ഗ്രസ് അവസാനിപ്പിക്കുമെന്ന് രാഹുല്‍ ഗാന്ധി പറഞ്ഞു. ഹരിയാനയുടെ സമൃദ്ധിയും സ്വപ്നങ്ങളും ശക്തിയും പത്തുവര്‍ഷത്തെ ഭരണത്തിലൂടെ ബി.ജെ.പി. നശിപ്പിച്ചുവെന്നും, അഗ്‌നീവിര്‍ പദ്ധതി യുവാക്കളുടെ സ്വപ്നങ്ങളെ കവര്‍ന്നെടുത്തെന്നും, തൊഴിലില്ലായ്മ കുടുംബങ്ങളെ കണ്ണീരിലാക്കിയെന്നും രാഹുല്‍ ഗാന്ധി എക്‌സില്‍ കുറിച്ചു.
ബിജെപിക്കെതിരെയുള്ള രാഹുലിന്റെ ആരോപണത്തിന് പിന്നാലെ കോണ്‍ഗ്രസിനെ വെട്ടിലാക്കി പ്രധാനമന്ത്രി നരേന്ദ്രമോദിയും രംഗത്ത്് വന്നു. കോണ്‍ഗ്രസിനെ വഞ്ചനാ പാര്‍ട്ടിയെന്ന് വിളിച്ചാണ് മോദി വിമര്‍ശനം ഉയര്‍ത്തിയത്. നേതാക്കള്‍ക്കിടയില്‍ ഒരുമ കൊണ്ടുവരാനാകാത്ത കോണ്‍ഗ്രസ് പാര്‍ട്ടി എവിടെ ഉണ്ടോ, അവിടെ സ്ഥിരതയുണ്ടാകില്ലെന്നും മോദി പരിഹസിച്ചു.
ആരാകണം മുഖ്യമന്ത്രി എന്നതില്‍ കോണ്‍ഗ്രസില്‍ ഇപ്പോഴേ തര്‍ക്കം തുടങ്ങിയെന്നും മോദി വിമര്‍ശിച്ചു. ഹരിയാനയില്‍ സംഘടിപ്പിച്ച പ്രചാരണ പരിപാടിയില്‍ സംസാരിക്കുകയായിരുന്ന മോദി കോണ്‍ഗ്രസ് ഭരിക്കുന്ന അയല്‍രാജ്യമായ ഹിമാചലിനെ ഉദാഹരണമാക്കിയാണ് തിരിച്ചടിച്ചത്. തെരഞ്ഞെടുപ്പ് കാലത്ത് കള്ളങ്ങള്‍ പറഞ്ഞ കോണ്‍ഗ്രസ്, ഭരണത്തിലെത്തിയപ്പോള്‍ വാഗ്ദാനങ്ങളില്‍ നിന്ന് ഒളിച്ചോടുകയാണെന്ന് ജന്‍ ആശിര്‍വാദ് റാലിയില്‍ മോദി പറഞ്ഞു.
എന്താണ് നിങ്ങളുടെ വാഗ്ദാനങ്ങള്‍ക്ക് സംഭവിച്ചതെന്ന് ഹിമാചലിലെ ജനങ്ങള്‍ കോണ്‍ഗ്രസിനോട് ചോദിക്കുമ്പോള്‍, നിങ്ങള്‍ ആരാണെന്നാണ് കോണ്‍ഗ്രസ് ജനങ്ങളോട് ചോദിക്കുന്നതെന്നാണ് മോദി പരസ്യമായി പരിഹസിച്ചത്. എന്താണ് നിങ്ങളുടെ വാഗ്ദാനങ്ങള്‍ക്ക് സംഭവിച്ചതെന്നര്‍ധമുള്ള ക്യാ ഹുവാ തേരാ വാദാ എന്ന ഹിന്ദി ഗാനവും മോദി ആലപിച്ചു.
ഡല്‍ഹിയിലെ റോയല്‍ ഫാമിലി അവരുടെ നുണകള്‍കൊണ്ട് ഹിമാചലിലെ ജനങ്ങളെ കുടുക്കിയിരിക്കുകയാണെന്നും മോദി പരോക്ഷമായി വിമര്‍ശിച്ചു.
