ന്യൂഡല്‍ഹി:എംപ്ലോയീസ് പ്രൊവിഡന്റ് ഫണ്ട് ഓര്‍ഗനൈസേഷന്‍ വരിക്കാര്‍ക്ക് മെച്ചപ്പെട്ട സേവനമാണ് അടുത്ത വര്‍ഷം മുതല്‍ ലഭ്യമാകുന്നത്. പിഎഫ് തുക എടിഎം വഴി പിന്‍വലിക്കാന്‍ സാധിക്കുന്ന ഐടി സംവിധാനമാണ് ഒരുക്കുന്നതെന്ന് തൊഴില്‍മന്ത്രാലയം അറിയിച്ചു. ജനുവരി മുതല്‍ സേവനം നടപ്പിലാക്കുമെന്നാണ് അധികൃതര്‍ അറിയിക്കുന്നത്.
പിഎഫ് തുക പിന്‍വലിക്കുന്നതിനായി അക്കൗണ്ട് ഉടമകള്‍ക്ക് പ്രത്യേക എടിഎം കാര്‍ഡുകള്‍ നല്‍കും.എന്നാല്‍ മുഴുവന്‍ തുകയും ഇത്തരത്തില്‍ പിന്‍വലിക്കാന്‍ സാധിക്കുകയില്ല. മറിച്ച് പ്രൊവിഡന്റ് ഫണ്ട് നിക്ഷേപത്തിന്റെ 50 ശതമാനം മാത്രമേ എടിഎം വഴി പിന്‍വലിക്കാനാകൂ. പദ്ധതി നടപ്പിലായാല്‍ അപേക്ഷകളും രേഖകളും നല്‍കി കാത്തിരിക്കേണ്ടി വരില്ലെന്നതാണ് ഗുണഭോക്താക്കളെ സംബന്ധിച്ച് ആശ്വാസകരമാവുന്നത്.
ഏഴ് കോടി വരിക്കാരാണ് ഇപിഎഫ്ഒയിലുള്ളത്. തൊഴിലാളികള്‍ക്ക് മെച്ചപ്പെട്ട സേവനം ലഭ്യമാക്കുന്നതിന്റെ ഭാഗമായാണ് നടപടിയെന്ന് കേന്ദ്ര തൊഴില്‍മന്ത്രാലയം അറിയിച്ചു. ഇതിന് പുറമെ പിഎഫ് അക്കൗണ്ടില്‍ നിക്ഷേപിക്കാവുന്ന പരമാനധി തുകയും വര്‍ധിപ്പിക്കാനും സാധ്യതയുണ്ട്. പദ്ധതി വിഹിതത്തിലെ നിലവിലെ 12 ശതമാന പരിധി എടുത്തുകളയുമെന്നും, തൊഴിലാളികള്‍ക്ക് ഇഷ്ടമുള്ള തുക വിഹിതമായി നല്‍കാനുള്ള സൗകര്യം ഒരുക്കുമെന്നുമാണ് ലഭിക്കുന്ന വിവരം.
