ന്യൂഡല്‍ഹി: ക്രഡിറ്റ് യോഗ്യതയെ പ്രതിഫലിപ്പിക്കുന്ന സിബില്‍ സ്‌കോറിനെ കുറിച്ച് അറിയാവത്തര്‍ വിരളമായിരിക്കും. ഹോം ലോണോ, കാര്‍ ലോണോ, മറ്റേതെങ്കിലും ലോണോ, ക്രെഡിറ്റ് കാര്‍ഡുകള്‍ക്കോ അപേക്ഷിക്കുമ്പോള്‍ നിങ്ങള്‍ക്ക് നല്ല സിബില്‍ സ്‌കോര്‍ ഉണ്ടായിരിക്കേണ്ടത് അനിവാര്യമാണ്. സിബില്‍ ഇടയ്ക്കിടക്ക് പരിശോധിച്ചാല്‍, മുന്നോട്ടുള്ള സാമ്പത്തിക കാര്യങ്ങള്‍ എങ്ങനെ കൈകാര്യം ചെയ്യണം എന്നതിനെ കുറിച്ച് നിങ്ങള്‍ക്കൊരു ധാരണ ഉണ്ടാകും.
തീര്‍ത്തും സൗജന്യമായി ഗൂഗിള്‍ പേയിലൂടെ സിബില്‍ സ്‌കോര്‍ പരിശോധിക്കാന്‍ കഴിയും. സിബില്‍ സ്‌കോര്‍ കാണിക്കുക മാത്രമല്ല, നിശ്ചിത മാസവും വര്‍ഷവും ഉള്‍പ്പെടെ, കാലതാമസം നേരിടുന്ന പേയ്മെന്റുകളുടെ വിശദാംശങ്ങളും ഗൂഗിള്‍ പേയില്‍ നല്‍കുന്നു. ഗൂഗിള്‍ പേ വഴി സിബില്‍ സ്‌കോര്‍ എങ്ങനെ പരിശോധിക്കാമെന്ന് നോക്കാം. അതിനായി ഗൂഗിള്‍ പേ ആപ്ലിക്കേഷന്‍ തുറന്ന് ഹോംപേജില്‍ ക്ലിക്ക് ചെയ്ത് ‘മാനേജ് യുവര്‍ മണി’ എന്ന ക്യാറ്റഗറി തിരഞ്ഞെടുക്കണം.
തുടര്‍ന്ന് നിങ്ങളുടെ സിബില്‍ സ്‌കോര്‍ സൗജന്യമായി പരിശോധിക്കാമെന്ന ഓപ്ഷന്‍ ക്ലിക്ക് ചെയ്ത ശേഷം സ്‌ക്രീനില്‍ കാണുന്ന നിര്‍ദ്ദേശങ്ങള്‍ കൃത്യമായി പാലിക്കുക. ഇനി ആദ്യാമായാണ് സ്‌കോര്‍ പരിശോധിക്കുന്നതെങ്കില്‍ കുറച്ച് വിശദാംശങ്ങള്‍ കൂടി നല്‍കേണ്ടതുണ്ട്. നിങ്ങളുടെ പാന്‍കാര്‍ഡില്‍ നല്‍കിയിരിക്കുന്ന പേര്, സാമ്പത്തിക അക്കൗണ്ടുകളുമായി ബന്ധിപ്പിച്ചിട്ടുള്ള ഫോണ്‍ നമ്പര്‍,ഇമെയില്‍ ഐഡി, പാന്‍ കാര്‍ഡ് നമ്പര്‍ എന്നിവയാണ് നല്‍കോണ്ട വിവരങ്ങള്‍.
ആവശ്യമായ വിവരങ്ങള്‍ നല്‍കിക്കഴിഞ്ഞാല്‍, ഗൂഗിള്‍ പേ നിങ്ങളുടെ സിബില്‍ സ്‌കോറും ക്രെഡിറ്റ് റിപ്പോര്‍ട്ടും സ്‌ക്രീനില്‍ തന്നെ ഉടനെ കാണിക്കുന്നതാണ്. പയോക്താക്കളെ അവരുടെ സിബില്‍ സ്‌കോര്‍ സൗജന്യമായി പരിശോധിക്കാന്‍ അനുവദിക്കുന്നതിനുപുറമേ അവരുടെ സ്‌കോര്‍ എങ്ങനെ മെച്ചപ്പെടുത്താം എന്നതിനെക്കുറിച്ചുള്ള ശുപാര്‍ശകളും ഗൂഗിള്‍ പേ നല്‍കുന്നുണ്ട്.
ഗൂഗിളിന്റെ റിപ്പോര്‍ട്ട് അനുസരിച്ച്, സിബില്‍ സ്‌കോര്‍ പരിശോധിക്കാനുള്ള ഫീച്ചര്‍ ആരംഭിച്ചതു ശേഷം 5 കോടിയിലധികം ഇന്ത്യക്കാര്‍ ഇത് ഉപയോഗിച്ച് എന്നാണ്. ഗൂഗിള്‍ പേ വഴി നേരിട്ട് നിങ്ങളുടെ ക്രെഡിറ്റ് ആരോഗ്യം നിലനിര്‍ത്തുന്നതിന് ഈ ഫീച്ചര്‍ സഹായിക്കും.
